Salssvikt for hyttebyggjarane
Salet av nye hytter har falle med 55 prosent på landsbasis sidan i fjor, medan igangsetjinga av nye hytter har falle med rundt 60 prosent.
Samtidig er omsetninga av brukte hytter så langt i år 20 prosent lågare enn i same periode i fjor.
– Ordrebøkene blir tømde frykteleg fort no, seier senioranalytikar Bjørn-Erik Øye ved Prognosesenteret til Dagens Næringsliv.
Han seier at rundt fem prosent av hushalda planlegg å kjøpe hytte. Under pandemien var denne andelen oppe i ni prosent.
I tillegg er renter og prisvekst viktige årsaker til fallet. Øye trur også uvisse rundt eigedoms- og formuesskatt, og kommunale avgifter i hyttestrøk speler inn.
– Akkurat no er utsiktene for hytteprodusentane veldig dårlege, seier han.
– Før pandemien vart det sett i gang bygging av omkring 5000 hytter i året, før det toppa ut på rundt 7500 i 2021. No ligg det an til 4500 i år, og vi har prognosar som seier det skal ned til 3000 til 3500 i 2023 og 2024.
– Så lågt kan eg ikkje hugse det har vore – kanskje berre under finanskrisa, seier Øye.
(©NPK)
Færre enn før drøymer om eiga hytte. Her frå eit hyttefelt på Tempelseter i Eggedal i Sigdal kommune. Foto: Halvard Alvik / NTB / NPK