Sandefjord risikerer å bli kasta ut av 3. divisjon

NFF Agder har avgjort å kaste Sandefjord ut av 3. divisjon avdeling 5 etter at klubben ikkje stilte lag i heimekampen mot Eiger.

Sandefjord har anka avgjerda til NFF sentralt.

– Vi prioriterte å sende juniorlaget til ein eliteturnering i Nederland, for femte året på rad. NFF oppmuntrar lag med ambisjonar om å sende unge spelarar til denne typen turneringar. Samstundes fekk me ei rekkje skadar og noko sjukdom i våre lag. Vi kunne dokumentere ni skadde eller sjuke spelarar like før Eiger-kampen, og i tillegg blei to til skadde etter at vi informerte NFF Agder og Eiger. Men dette blei det ikkje teke omsyn til, seier dagleg leiar i Sandefjord Fotball, Per Ketil Berg til Sandefjords Blad.

Ifølgje lokalavisa prøvde Sandefjord Fotball ved fleire høve å utsetje kampen, men fekk ikkje løyve til dette av NFF Agder. Dermed valde bortelaget å ta den litt over fem timar lange bussturen frå Egersund til Sandefjord for å spele kamp. Dei tre dommarane stod òg klare, men heimelaget dukka altså ikkje opp.

Regelverket til Norges Fotballforbund seier dette:

«Lag i 0.- 3. divisjon menn og 0. og 1. divisjon kvinner som uteblir frå seriespel utan gyldig grunn skal – med mindre særlige forhold tilsier noe annet – utelukkes frå framleis spel i inneverande sesong og alle lagets kampar annulleres».

Om Sandefjord 2 blir teke ut frå 3. divisjon kan det få store konsekvensar for dei nest beste spelarane til den opprykksjagande 1.-divisjonsklubben. Laget får ingen fleire kampar i 2016, og må starte opp i 4. divisjon frå neste sesong. (©NPK)