Tips oss:
Tips
Sentralbord: 70 07 44 22 Mobil: 995 22 999
Kontakt
Den finske statsministeren Sanna Marin beklaga tysdag eit bilete som vart teke av to kvinner som var på fest i den offisielle residensen.
linus.rovik.hauge@ntb.no/hege.grov@npk.no
Publisert: 23.08.2022 kl 15:11
Marin forklarte at ho hadde invitert venner til å ta badstove i statsministerbustaden Villa Bjälbo etter rockefestivalen Ruisrock.
Tysdag sirkulerte eit bilete av to festdeltakarar i sosiale medium. Dei to kvinnene kysser kvarandre medan dei held eit skilt der det står «Finland» framfor dei nakne brysta sine.
– Dette biletet er ikkje passande, og det burde ikkje vorte teke, sa Marin på ein pressekonferanse i Helsingfors med president Sauli Niinistö.
Marin opplyste at biletet er teke på toalettet i statsministerbustaden, melder Yle.
Ho la til at det ikkje skjedde noko oppsiktsvekkjande den kvelden. Ho og gjestene var i badstova, på gjestetoalettet og utanfor bygningen den kvelden.
Den aktuelle kvelden er den einaste private tilstellinga ho personleg har arrangert i ferien, forklarte Marin. I tillegg er det halde mange andre offisielle festtilstellingar i embetsbustaden den sommaren.
Marin sa vidare at festen ikkje utgjorde nokon tryggingstrussel.
– Tryggleiken er alltid overvakt på Villa Bjälbo, og vektarane har vore klare over kven som er der, sa statsministeren.
Biletet kjem i etterkant av den mykje omtalte videoen som vart kjend førre veke. På videoen kan ein sjå Marin danse med venner på ein privat fest. For å unngå spekulasjonar om ho hadde brukt narkotika, tok Marin ein narkotikatest. Resultatet var klart måndag og viste at Marin hadde testa negativt.
(©NPK)
Statsminister Sanna Marin seier biletet som vart teke av to av gjestene hennar i statsministerbustaden, ikkje var passande. Men ho avviser at badstove-festen utgjorde ein tryggingsrisiko. Foto: Roni Rekomaa/Lehtikuva via AP/NTB
Artikkelen fortsetter etter annonsen.