Sanner opnar for at kommunar kan kjøpe seg betre tid

Fristen for frivillig samanslåing går ut 1. juli, og kommunar som ikkje slår seg saman får ikkje del i økonomiske fordeler. Statsråden seier til Dagens Næringsliv at kommunar som treng meir tid på å komme fram til ei frivillig løysing kan få det av fylkesmannen.

– Eg vil ikkje kalle det «utsetting». Men i samråd med fylkesmannen finst det moglegheit for ei endring for når kommunen endeleg må melde inn si avgjerd, seier han.

Han viser til Re kommune i Vestfold, som har fått utsetting.

– Det er fordi dei har starta ei forhandling om ei ny løysing, forklarar Sanner.

21. februar møtte ordføraren i Re kommune, Thorvald Hillestad (Sp), og rådmannen og fylkesmann Erling Lae kommunalministeren i Oslo. Der fekk kommunen utsett fristen for frivillig løysing til 1. oktober.

– Sanner stilte to krav. Vi måtte synleggjere kven som var kandidatane, og vi måtte få eit svar på om dei var interesserte i oss, opplyser Hillestad.

Men ordførarane må ikkje troppe opp på kontoret til Sanner for å få unntak.

– Eg kan ikkje seie ja og nei i enkeltsaker, men eg sa til Lae at han kunne finne ei løysing. Poenget er at fylkesmannen har frist til 1. oktober, så fylkesmannen kan bidra til ei løysing. I heilt spesielle situasjonar er det «common sense» å gjere dette, seier Sanner. (©NPK)