Schibsted vil leggje ned trykkjeri i Stavanger

(NPK-NTB): Styret i Schibsted Trykk AS innstiller på å leggje ned trykkjeriet på Forus utanfor Stavanger i haust. Det betyr 38 tapte arbeidsplassar i oljehovudstaden.

npk@npk.no

Publisert: 30.05.2016 kl 16:32

Ei endeleg avgjerd tek Schibsted Norge på eit styremøte i sommar, skriv Medier 24. Det stadfestar Harald Jacobsen, konserndirektør i Schibsted og styreleiar i Schibsted Trykk AS.

– Styret i Schibsted Trykk har innstilt på dette. Den endelege avgjerda vil bli teke på styremøtet i Schibsted Norge AS 28. juni, seier Jacobsen.

Vedtaket kjem berre eit drygt år etter at trykkjeriet i Kristiansand blei lagt ned, og i fjor la Schibsted òg ned eitt av trykkjeria i Bergen.

Om nedlegginga blir ein realitet vil venteleg nokre av dei tilsette bli tilbode jobb ved eitt av konsernets andre trykkjeri, skriv Medier 24.