Sekkingstad truleg til Noreg tysdag

Sotra-mannen blei søndag overlevert til filippinske styresmakter etter å ha sete eitt år i fangenskap hos den islamistiske Abu Sayyaf-geriljaen på Filippinane.

Sekkingstad var tydeleg prega av eit brutalt år som gissel, då han møtte norsk og internasjonal presse saman med Filippinanes president Rodrigo Duterte søndag ettermiddag. Han blei seinare flogen til hovudstaden Manila, der han blir vareteken av tilsette ved den norske ambassaden.

UD opplyser til NTB måndag morgon at Sekkingstad skal gjennom ein grundig helsesjekk i Manila måndag, før han etter planen reiser til Noreg tysdag.

Sekkingstad har dei 15 siste åra budd på Filippinane. (©NPK)