Sjakk: Carlsen overlegen i første semifinale

Det betyr at Carlsen framleis ikkje har tapt ein kamp i turneringa. Takka vere to sigrar med svarte brikker slo han russiske Svidler 2,5-0,5. Det var avgjord etter tre av fire parti.

Carlsen slo Svidler òg måndag, då med 2,5-1,5. Fredag gjentok nordmannen bedrifta og sikra med det den tiande strake sigeren i turneringa.

Med svarte brikker starta Carlsen svært godt og vann det første partiet. Det gav han eit strålande utgangspunkt, men den norske sjakkstjerna klarte berre remis i det andre partiet med kvite brikker.

Carlsen vann igjen med svarte brikker i det tredje partiet, og dermed var triumfen i boks.

Semifinale nummer to blir allereie spelt laurdag, medan ein eventuell tredje duell går dagen etter. Finalen blir spelt gjennom tre oppgjer frå 3. til 5. august.

I den andre semifinalen speler Jan Nepomnjatsjtsjij og Anish Giri, men der er det enno ikkje kåra ein vinnar.

(©NPK)

Magnus Carlsen er utan tap i Legends of Chess-turneringa. Foto: Heiko Junge / NTB scanpix