Sjølvmordsangrep mot hotell i Mogadishu

Angrepet mot Ambassador Hotel skjedde onsdag kveld. Ein sjølvmordsbombar sprengde først ein bil full av sprengstoff utanfor hotellet. Deretter storma fleire andre angriparar hotellet og begynte å skyte.

Ifølgje augevitne vart minst seks menneske drepne, mens andre seier talet på drepne er mykje høgare.

Hotellet ligg i sentrum av byen og er hyppig brukt av offentleg tilsette og folk i finansbransjen. Den militante islamistgruppa al-Shabaab seier dei står bak. Gruppa har også tidlegare gjennomført mange liknande angrep.

Tidlegare onsdag opplyste det amerikanske forsvarsdepartementet at ein av al-Shabaab-leiarane «truleg» vart drepen i eit amerikansk luftangrep 27. mai. (©NPK)