Skoglund vann kontinentalcuprenn i Lahti

Skoglund vann eit spurtoppgjer om sigeren med to av dei tre som enda framfor han i bakken, tyskarane Terence Weber og Wendelin Thannheimer. Weber vart slått med 3,4 sekund, Thannheimer med 4,2.

Den 21-årige nordmannen starta langrennet 26 sekund etter hoppvinnar Thannheimer.

Sebastian Østvold vart nummer fem, Kasper Moen Flatla seks og Simen Tiller sju, medan Torje Seljeset på 10.-plass sørgde for at nordmenn utgjorde halvparten av topp ti.

Webar styrkte leiinga i kontinentalcupsamandraget med tre individuelle renn igjen. Han er 200 poeng føre austerrikaren Manuel Einkemmer, medan Thannheimer er nummer tre. Einar Lurås Oftebro er beste nordmann på 5.-plass, men han har ikkje delteke i dei siste kontinentalcuprenna og har Østvold berre ti poeng bak seg.

Det er lagsprint i Lahti laurdag, nytt individuelt renn søndag før kontinentalcupen blir avslutta i Oberwiesenthal neste helg. Då er det renn både for kvinner og menn.

(©NPK)

Andreas Skoglund vann kontinentalcuprennet i kombinert i Lahti fredag. Foto: Geir Olsen / NTB