Skrtel på veg til tyrkisk fotball

(NPK-NTB): Liverpool-stoppar Martin Skrtel er i samtalar med den tyrkiske eliteserieklubben Fenerbahçe. Tyrkarane stadfestar at dei ønskjer slovaken, ifølgje BBC.

npk@npk.no

Publisert: 07.07.2016 kl 17:39

Overgangssummen vil liggje på rundt 60 millionar kroner, ifølgje Liverpool Echo.

– Liverpool har akseptert eit bod frå den tyrkiske klubben, og Skrtel er klar for å flytte på seg, skriv lokalavisa.

31 år gamle Skrtel starta 21 seriekampar for Liverpool førre sesong, og var kaptein for Slovakia før laget rauk ut av fotball-EM i sommar, men Liverpool-manager Jürgen Klopp er likevel ikkje overbevist. Dei raude frå Merseyside henta i tillegg inn midtstoppar Joel Matip frå Schalke nyleg, noko som aukar konkurransen på stopparplass.

Skrtel kom til Liverpool frå russiske Zenit i 2008.

Fenerbahçe vart nummer to i den tyrkiske eliteserien førre sesong. Klubben har kjente namn som nederlandske Robin van Persie og danske Simon Kjær i stallen frå før av. (©NPK)