Spania truar med å velte brexitavtalen
Spanias statsminister Pedro Sanchez truar med å seie nei til skilsmisseavtalen med Storbritannia viss ikkje formuleringane om Gibraltar blir endra.
EU held eit ekstraordinært toppmøte førstkommande søndag der stats- og regjeringssjefane i EU etter planen skal gi si velsigning til avtaleutkastet som no ligg på bordet.
Men ifølgje Sanchez må artikkel 184 i avtaleteksten endrast før Spania kan godta han.
Gibraltar ligg på Spanias sørkyst og har vore britisk territorium sidan 1713. Men Spania har gong på gong gjort krav på regionen.
- Gibraltar høyrer ikkje til Storbritannia, seier Sanchez.
Spanias krav er at ein framtidig avtalte om Gibraltars status må haldast skilt frå forhandlingane om det framtidige tilhøvet mellom EU og Storbritannia.
Den spanske regjeringa ønsker i staden direkte forhandlingar mellom Spania og Storbritannia.
(©NPK)
Spanias statsminister Pedro Sanchez er misnøgd med omtalen av Gibraltar i utkastet til skilsmisseavtale mellom EU og Storbritannia. Foto: AP / NTB scanpix