«Spionleilegheita» til Arne Treholt er seld
Leilegheita der Treholt vart overvakt på 1980-talet, er seld for 32,5 millionar kroner – 2,5 millionar under det opphavlege prisforslaget.
– Eg kan stadfeste at leilegheita er seld for 32,5 millionar kroner, seier meklar Kristian Bull til Nettavisen.
Bustaden, som ligg midt i ambassadestrøket til hovudstaden, vart i januar lagt ut for sal med eit prisforslag på 35 millionar kroner.
Arne Treholt budde i leilegheita på 1980-talet, då han var under etterforsking for spionasje til fordel for Sovjetunionen.
Leilegheita vart utsett for ein storstilt overvakingsaksjon. Politiets overvakingsteneste følgde med hjelp frå CIA i eitt og eit halvt år med på kvar minste rørsle i leilegheita. Treholt vart i 1985 dømd for spionasje, noko han nekta for heilt fram til han døydde i 2023.
Bull trur ikkje at den spesielle historia til leilegheita har hatt noko å seie for interessa.
– Det meiner vi ikkje har spelt noka rolle. Det er ei veldig fin leilegheit med mange kvalitetar utanom det vanlege, sa Bull til Nettavisen i mars, då prisen vart kutta.
(©NPK)
Arne Treholt bedyra si uskuld heilt fram til han døydde i 2023. Her avbilda i 2019. Foto: Vidar Ruud / NTB