Statsforvaltaren med sterk kritikk av barnevernet i ny tilsynsrapport

– Det var feil å føre barna tilbake til foreldra. Det er også svært alvorleg at barna har måtta lide på grunn av feilvurderingar, seier fungerande barnevernsleiar Anne Grethe Rosså Ramsvik i ei pressemelding etter å ha fått tilsynsrapporten.

I rapporten har Statsforvaltaren konkludert likt som det barneverns- og helsenemnda i Rogaland gjorde tidlegare i år: Tilbakeføringa av barna var feil.

Kommunen: – Samd i kritikken

Sommaren 2022 vart fleire barn frå same familie teken ut av heimen og akuttplassert. Trass i fleire bekymringsmeldingar om vald i heimen, valde barnevernstenesta i Stavanger kommune å føre barna tilbake til foreldra i 2023.

– Vi har i etterkant av tilbakeføringa følgt opp ny bekymring for barna og gjort tiltak slik at ingen av dei no bur saman med foreldra sine, seier Ramsvik.

Kommunen skriv i pressemeldinga at dei er samde i kritikken frå Statsforvaltaren. Samtidig erkjenner kommunen at den faglege usemja internt i denne saka skulle ha vorte teken på større alvor.

Anka barnevernsnemndvedtaket

I tilknyting til konklusjonen i barneverns- og helsenemnda i den same saka fortel advokaten til mora, Malin Holgersen, til Stavanger Aftenblad at klienten hennar ikkje ønskjer å kommentere saka.

Nemnda vedtok i mars at barnevernstenesta overtek omsorga for dei to siste barna som budde hos foreldra.

Advokaten til faren stadfestar overfor Aftenbladet at avgjerda er anka til Sør-Rogaland tingrett.

Dette er den andre gongen i år at Statsforvaltaren rettar sterk kritikk mot barnevernstenesta i Stavanger kommune. For litt over to månader sidan konkluderte Statsforvaltaren med at barnevernet braut barnevernslova på fleire punkt i den såkalla fosterheimssaka.

(©NPK)

Barnevernstenesta i Stavanger kommune har fått mykje kritikk frå fleire hald dei siste månadene. No har Statsforvaltaren konkludert i saka om tilbakeføring av ein søskenflokk. Biletet viser rådhuset i Stavanger. Foto: Carina Johansen / NTB