Statsforvaltaren politimelder fest i verneområde på Jæren

Strandfesten vart arrangert ei helg i slutten av juli på stranda Ognasanden, 50 kilometer sør for Stavanger.

Politiet stadfestar overfor Jærbladet at Statsforvaltaren i Rogaland har meldt arrangørane for brot på naturmangfaldlova og for motorisert ferdsel i eit verneområde.

Verneområdet det dreier seg om er Jærstrendene. Det er ifølgje Miljødirektoratet eit område med eit eineståande natur- og kulturlandskap, med dei finaste sanddynestrendene i Noreg.

– Eg kan stadfesta at me har fått inn ei melding på ei hending i Laugarvika, Ogna, seier politiadvokat Bjarte Myklebust ved Felles straffesaksinntak hos Politiet i Sør-Vest til Jærbladet.

Saka blir truleg etterforska av Miljøseksjonen i politiet, ifølgje Myklebust.

Det var Jæren friluftsråd som fyrst tipsa Statsforvaltaren om festen, der skal ha vore lys- og lydanlegg og motoriserte køyretøy i verneområdet.

(©NPK)