Statsministeren talte for Tryggingsrådet

Statsminister Erna Solberg (H) talte tysdag for Tryggingsrådet for første gong etter at Noreg vart medlem ved årsskiftet. Temaet var klima og tryggleik.

vaktsjef@ntb.no/kjell.asmund.sunde@npk.no

Publisert: 23.02.2021 kl 18:38

Solberg brukte dei tildelte minutta sine til mellom anna å teikne eit bilete av at klimautfordringar og valdelege konfliktar er samanfallande i store delar av verda, viser ei utskrift av talen på nettsidene til regjeringa.

Tolv av dei 20 landa som er mest sårbare i møte med klimaendringar, handterer òg valdelege konfliktar for tida, sa Solberg. I fleire delar av Afrika aukar konfliktnivået som følgje klimarelatert påverknad, og rekrutteringa til valdelege grupper aukar som følgje av mat- og ressursmangel.

– Vi risikerer ein negativ spiral: Klimaendringar undergrev evner til å handtere konflikt. Og konflikt undergrev motstandsdyktigheita mot klimaendringar, sa Solberg.

(©NPK)

Statsminister Erna Solberg (H) deltok tysdag i eit digitalt møte i FNs tryggingsråd om klimaendringar og tryggleik. Foto: Berit Roald / NTB

Solberg talte i Tryggingsrådet for første gong sidan Noreg blei medlem av rådet ved årsskiftet. Blant tilhøyrarane var Storbritannias statsminister Boris Johnson og FNs generalsekretær António Guterres. Foto: Berit Roald / NTB