Klargjør siden...

Stavanger-kvinne dømd på Madagaskar

(NPK-NTB): Ei kvinne frå Stavanger er dømd til tre månaders fengsel på Madagaskar for kjøp av cannabisolje.

Rettssaka mot kvinna vart gjennomført torsdag og vart avslutta med domsavseiing. Advokatane til kvinna vurderer å anke dommen, skriv Stavanger Aftenblad.

Kvinna vart tiltalt for kjøp av cannabisolje i den gassiske byen Antsirabe, etter at ho vart arrestert 22. desember i fjor. Ho var òg sikta for å ha brukt og dyrka narkotika, men desse punkta vart tatt ut av tiltalen.

Kvinna, som driv med hjelpearbeid på Madagaskar, har forklart at ho kjøpte ei flaske med det ho trudde var naturleg honning, men statsadvokaten meiner innhaldet var cannabisolje.

– D et var honning ho bad om å få kjøpe, og det trudde ho at ho fekk. Først etter å ha smakt på innhaldet, forstod ho at det ikkje var honning, sa forsvararen til kvinna under rettssaka.

Forsvararen sa at flaskeinnhaldet ikkje er analysert, og at dei berre har politiet som vitne på at innhaldet er cannabisolje. Han bad om at retten måtte frifinne kvinna, mens aktor meinte det er bevist at ho har gjort seg skuldig i narkotikakriminalitet. (©NPK)

Annonse