Stoltenberg forsvarer Natos Russland-linje

– Nato står samla om å ønskje dialog med Russland samtidig som vi styrkjer det kollektive forsvaret. Det er inga motsetjing i dette, seier Stoltenberg til NTB.

– Vi ønskjer ikkje ein ny kald krig og står samla om å arbeide for avspenning, men vi ser det òg som heilt nødvendig med ei militær styrking fordi vi lever i ei farlegare verd, seier han.

Nato-generalsekretæren var måndag i Trondheim i samband med ei større øving. Han er godt kjent med intervjuet med Steinmeier i Bild am Sonntag, der den tyske utanriksministeren åtvarar Nato mot å provosere Russland ved å halde store militærøvingar i Aust-Europa. Steinmeier ber òg om at EU lettar på sanksjonane dersom det blir gjort framsteg i fredsprosessen og den såkalla Minsk-planen for Ukraina blir implementert.

– Eg er trygg på at EU ikkje kjem til å oppheve sanksjonane før dei ser ei substansiell endring i Russlands åtferd, seier Stoltenberg. (©NPK)