Stoltenberg: Nato-landa skal gi Ukraina fleire luftvernsystem

Avgjerda vart teken på eit videomøte i Nato-Ukraina-rådet fredag som følgje av desperate appellar frå Ukraina om meir luftvern til å stanse stadig meir aggressive russiske angrep.

– Nato har kartlagt eksisterande kapasitet innan alliansen, og det finst system som kan overførast til Ukraina. Så eg forventar nye kunngjeringar om luftvernkapasitet til Ukraina snart, sa Stoltenberg etter møtet.

– Hjelp er på veg. Og eg ventar kunngjeringar om meir hjelp og støtte i nær framtid, sa han.

Forutan Patriot-systemet finst det andre system, som det franske Samp/T, sa han, Men han ville ikkje røpe detaljar om kor mange som kan og vil bli send til Ukraina.

– Viktigast å hjelpe Ukraina

Han sa også at han har orientert landa om at sjølv om dei bryt med Natos kapasitetskrav ved å tømme lagera sine for å sende våpen til Ukraina, er det ein risiko som er nødvendig å ta.

Dei landa som ikkje har luftvernsystem å avsjå, har lova å bidra med økonomisk støtte til innkjøp av luftvern, sa han vidare.

På spørsmål stadfestar han at Ukraina har rett til både å skyte ned russiske fly og angripe legitime militære mål på russisk jord når dei får kampfly.

Det var Ukrainas president Volodymyr Zelenskyj som bad om det virtuelle hastemøtet med Natos forsvarsministrar og Stoltenberg, ettersom Ukraina manglar ammunisjon, både som følgje av blokkeringa av ein støttepakke i Kongressen i USA og fordi europeiske land er trege med dei lova leveransane sine.

Zelenskyj sa i eit videoinnlegg han heldt under møtet at den utanlandske hjelpa til landet akkurat no ligg på eit «svært avgrensa nivå», og at det hastar med militær hjelp.

– Ukraina treng langtrekkjande rakettar og artilleri no, sa han.

Behov for mykje luftvern

Før møtet sa Zelenskyj at Ukrainas forsvar har behov for meir artilleri, køyretøy og dronar, og særleg luftvern, til å forsvare seg mot stadig kraftigare russiske angrep på infrastrukturen i landet.

Han sa at Ukraina treng 25 Patriot til luftvernsystem, eller tilsvarande system, for å verne luftrommet fullt ut.

Tyskland kunngjorde i helga at dei sender endå eit Patriot-system frå lagera sine i tillegg til dei to landa har sendt, og det er venta positive svar også frå andre land, blant dei Spania. USA har det største talet Patriot-system på plass i Europa.

Zelenskyj har sagt at dei er stadig meir bekymra for om dei klarer å halde frontlinja mot russiske angrepsbølgjer og verne vital infrastruktur i energisektoren.

I dei siste vekene har Russland trappa opp presset og øydelagt nesten alle varmekraftverka i landet i luftangrep, seier han.

Natos generalsekretær Jens Stoltenberg med den britiske utanriksministeren David Cameron på G7-møtet på Capri. Han seier at Nato-Ukrainarådet har vedteke å gi Ukraina fleire luftvernsystem. Foto: Gregorio Borgia / AP / NTB

Tyske Patriot luftvernsystem på ein flybase i Tyskland. Tyskland har vedteke å sende ytterlegare eit slikt luftvernsystem til Ukraina som har desperat behov for meir luftvern for å verne seg mot russiske angrep. Foto: Axel Heimken / dpa via AP / NTB

Ein knust bil ved sida av eit øydelagt bygg etter eit russisk luftangrep i Dnipro fredag. Foto: Dnipropetrovsk regionale militæradministrasjon via AP / NTB