Stortinget må vente på innstilling i saka om Nigeria-båtane

(NPK-NTB): Kontrollkomiteen på Stortinget ventar med å gi frå seg innstillinga si i saka om dei såkalla Nigeria-båtane til etter pinse.

npk@npk.no

Publisert: 12.05.2016 kl 15:55

Det vedtok komiteen på eit møte torsdag.

Utsetjinga kjem av tekniske grunnar, opplyser komitéleiar Martin Kolberg (Ap) til NTB.

Komiteen leverer innstillinga si 20. mai, mens saka kjem opp i Stortinget ei knapp veke seinare, 26. mai.

Stortinget skulle eigentleg ha behandla saka i slutten av april, men ho vart trekt fordi Forsvarsdepartementet ikkje hadde levert fleire rapportar i tide.

Forsvarsminister Ine Eriksen Søreide (H) måtte tole krass kritikk for å ha drygd i fem månader med å sende over rapportane til kontrollkomiteen.

Det var Dagbladet som først avslørte at norske marinefartøy hadde hamna hos paramilitære styrkar i Nigeria og Kamerun. Deretter vart det avdekt at beltevogner var blitt selde til Sudan, og at militære lastebilar enda i Eritrea, alt i strid med FNs embargo. (©NPK)