Strandhandballkvinnene gjekk på tap mot Nederland i VM

Kampen starta veldig jamt, men dessverre for dei norske kvinnene trekte Nederland det lengste strået, og vann det første settet 20-18. Noreg klarte ikkje å kjempe seg tilbake og nederlendarane vann også det andre settet med siffera 26-20.

Noreg har vore ein medaljegrossist i VM-samanheng på kvinnesida.

I 2018 vart det sølv etter finaletap mot Hellas, medan i dei tre tidlegare meisterskapane vart det bronse. I VM i 2010 gjekk det norske kvinnelaget heilt til topps.

VM i år er den første meisterskapen der kvinnene slepp å måtte spele i bikinitruser.

Det skapte store overskrifter i fjor sommar då Noreg fekk bot for å spele med tights i bronsefinalen i EM som ein protest mot den dåverande bikiniregelen.

Dei kraftige reaksjonane mot bota førte til slutt til at Det internasjonale handballforbundet (IHF) vedtok å fjerne regelen og tillate spel i tights.

Meisterskapen blir halden i Iráklio, Hellas.

(©NPK)

Illustrasjonsfoto.
Foto: Heiko Junge / NTB