Subsea 7 seier opp 1.200 tilsette

Administrerande direktør Jean Cahuzac seier i ei melding til Dagens Næringsliv at i lys av vanskelege tider vil selskapet gå inn i ein ny fase med kostnadsreduksjonar i 2016. Dette vart varsla etter framlegginga av resultatet i første kvartal i år.

Inntil 260 tilsette i Noreg blir ramma av nedbemanningane, skriv Stavanger Aftenblad. Selskapet har i dag kontor i Stavanger, Oslo, Grimstad, Vigra og Tromsø.

Kontora i Oslo (52 tilsette), og Grimstad (38 tilsette) blir vurdert nedlagde. Dei tilsette fekk vite om nedbemanningsplanane på eit allmøte torsdag.

– Reduksjonen i arbeidsstyrken er eit nødvendig trinn for å behalde vår konkurransekraft og beskytte vårt kjernetilbod gjennom oljepris-syklusen, seier Cahuzac.

Selskapet vil gjennomføre fleire kostnadsinnsparande tiltak på opptil 350 millionar dollar per år.

Subsea 7 sette i mai i fjor i gang omfattande sparetiltak der dei reduserte flåten med elleve fartøy, samtidig som 2.500 stillingar forsvann globalt. I Noreg mista 180 tilsette jobben. (©NPK)