Suu Kyi får nyoppretta post i regjeringa i Myanmar

Underhuset i nasjonalforsamlinga godkjente tysdag Suu Kyi i ei stilling som liknar statsministerposten og gjer det mogleg for henne å jobbe med alle av hovudområda til regjeringa.

Suu Kyi står nemnt ved namn i lovforslaget, og det står også at hennar periode er den same som for presidenten.

– Dette er måten vi har valt for at Daw Suu kan overvinne den konstitusjonelle hindringa, seier talsperson Win Htein i Suu Kyis parti Den nasjonale demokratiligaen (NLD) og brukar eit heidersnamn for henne.

Aung San Suu Kyi kunne ikkje bli valt til president fordi ho har vore gift med ein utlending, og fordi ho har to søner som er utanlandske statsborgarar.

Planen hennar var derfor å styre landet indirekte via ein representant. Den utvalde var ein godt bevart løyndom fram til ho kunngjorde Htin Kyaw, ein nær venn og tidlegare sjåfør, som kandidat. Han vart tatt i eid som president i slutten av mars.

70 år gamle Suu Kyi er tidlegare tatt i eid i fire ministerpostar, men vart måndag avløyst som utdanningsminister og energiminister. Ho har framleis utanriksministerposten og ein annan posisjon ved presidentkontoret. (©NPK)