Svak nedgang på Oslo Børs

BW Ideol og Magnora, som eig Magnora Offshore Wind, var blant børsvinnarane måndag etter å ha fått tildelt havvindlisensar i Skottland, skriv E24. BW Ideol steig ikkje mindre enn 24 prosent, medan Magnora hadde ein oppgang på 18 prosent.

Aker Offshore Wind fekk ikkje kontrakt og vart den store taparen måndag med ein nedgang på over 20 prosent.

Også oppdrettskonsernet NTS var ein av vinnarane måndag etter at ei gruppe aksjonærar varsla at dei har planar om å leggje inn eit bod på heile selskapet, skriv Dagens Næringsliv. Aksjen steig 14 prosent.

Oppgang for oljeprisen

Equinor var også blant søkjarane som ikkje fekk tildelt havvindkontraktar, men dette fekk ikkje konsekvensar på nivå med Aker Offshore Wind-aksjen. Equinor enda med ein nedgang på 1,6 prosent og var blant dei mest omsette aksjane for dagen saman med Aker BP (-0,8), Nordic Semiconductor (+3,5), MPC Container Ships (-2,5) og Yara (+0,3).

Energisektoren fall 1,4 prosent, medan sjømatsektoren hadde eit fall på 0,7 prosent og shipping på 0,3 prosent.

Ved 16.40-tida hadde oljeprisen stige 2,5 prosent, og eit fat nordsjøolje vart omsett for 86,14 dollar.

Oppgang i Europa, stengd i USA

I Europa var det oppgang på dei viktigaste børsane. Dax 30 i Frankfurt steig 0,4 prosent, medan FTSE 100 i London hadde ein oppgang på 0,9 prosent og CAC 40 i Paris på 0,8 prosent.

Dei amerikanske aksje- og obligasjonsmarknadene held måndag stengd på grunn av fødselsdagen til Martin Luther King jr., som er ein offentleg fridag i USA.

(©NPK)

Hovudindeksen på Oslo Børs enda med nedgang måndag. Foto: Erik Johansen / NTB