Svensk storbank hardt ramma av datatrøbbel

Dataproblema oppstod etter midnatt og kjem av ein intern feil, ifølgje Swedbank. Alle tenester var ei tid ute av funksjon, medan kortbetalingar, kundesenteret, nettsida til banken og app kom i drift att fredag morgon.

Pressesjefen i banken, Unni Jerndal, lovar at alle kundar som har tapt økonomisk som følgje av problema, skal få erstatning.

– Vi ber verkeleg om unnskyldning, seier Jerndal, som forsikrar at banken jobbar med full kraft for å løyse situasjonen.

Pressesjefen seier at det ikkje er snakk om noko dataangrep utanfrå, men vil ikkje seie om problema kjem av oppdateringar av eige system. Kundar som ikkje fekk kontakt med banken på telefon, vart bedne om å ta kontakt på sosiale medium.

Swedbank har rundt åtte millionar privatkundar. Banken har òg forretningskundar i Noreg.

(©NPK)

Swedbank jobbar på spreng med å løyse dataproblema som oppstod natt til fredag.
Foto: Terje Pedersen / NTB scanpix