Svindal, Jansrud og Kilde med trippelsiger

Det var Svindals fjerde verdscupsiger denne sesongen etter at han kom tilbake frå skade i 2014. Han tok tre strake sigrar i Lake Louise og Beaver Creek i slutten av november og byrjinga av desember.

– Det var gøy i dag, og eg trur det er første gongen at vi vinn trippelsiger i ei fartsøving. Det er rått å vere med på å gjere noko som er så ekstremt, sa Svindal til NRK.

Fredag slo han Jansrud med 0,34 sekund, og det var i avsluttinga av løpet Svindal avgjorde. Han starta ikkje heilt optimalt og var litt bak i opninga.

Kjetil Jansrud vann i Val Gardena i fjor. Han starta på ein rå måte, men tapte litt til Svindal frå og med den andre mellomtida. Også Jansrud heldt godt mot slutten.

Aleksander Aamodt Kilde var den som både imponerte og overraska mest. Han køyrde inn til suverent beste tid frå startnummer fire, og han var ikkje trua før Svindal og Jansrud kom.

Austerrikaren Matthias Mayer gjorde det litt spennande, men også han var over halvsekundet bak i mål. (©NPK)