Taleregistratoren til EgyptAir-flyet er funnen

(NPK-NTB-AP): Taleregistratoren til EgyptAir-flyet som styrta i Middelhavet førre månad, er funnen, opplyser egyptiske styresmakter.

Boksen med taleregistratoren er skadd, men ekspertar skal ha greidd å finne minneeininga som kan kaste lys over kva som fekk flyet til å styrte, opplyser luftfartsstyresmaktene i Egypt.

Boksen er no på veg tilbake til fastlandet om bord i skipet som fann han og henta han opp frå djupet.

Onsdag vart det kjent at leitefartøyet John Lethbridge hadde funne vrakdelar frå flykroppen fleire stader.

EgyptAirs rute MS804 styrta i Middelhavet med 66 menneske om bord på veg frå Paris til Kairo 19. mai. Årsaka til styrten er ikkje kjent. (©NPK)