Opptøyane krev liv på Sri Lanka

– Eg går av straks, slik at du kan peike ut ei fleirpartiregjering til å styre landet ut av den økonomiske krisa, heitte det måndag i brevet frå statsministeren til broren, president Gotabaya Rajapaksa.

Den 76 år gamle Mahinda Rajapaksa overtok som statsminister i november 2019. Nyheita om at han gjekk av, førte ikkje til stans i opptøyane.

Fem menneske er drepne og minst 189 er skadde i kraftige samanstøytar mellom meiningsmotstandarar og tryggingsstyrkar det siste døgnet, ifølgje politiet.

Storma protestleir

Over 1.000 tilhengjarar av Rajapaksas parti SLPP storma ifølgje politiet protestleiren til opposisjonen utanfor presidentkontoret og sette fyr på telta der. SLPP-tilhengjarane var væpna med køller og klubbar.

Rundt 150 motstandarar av regjeringspartiet gjekk på si side laus på bussar med SLPP-tilhengjarar som hadde delteke på eit møte med den avtroppande statsministeren.

Rundt 20 slike bussar og vel 30 bilar til SLPP-tilhengjarar vart sette i brann måndag.

Ein medlem av nasjonalforsamlinga og livvakta hans, som også hadde delteke på møtet, vart angripen av ein mobb. Dei to søkte tilflukt i ein bygning der parlamentarikaren etter det som blir sagt skal ha teke sitt eige liv då dei vart omringa. Det er uklart om livvakta vart drepen i episoden i Nittambuwa, rundt 40 kilometer aust for Colombo.

Portforbod

Ein annan SLPP-politikar skal ha opna eld og drepe to demonstrantar og såra fem andre i Weeraketiya sør i landet.

Motstandarar av regjeringa prøvde også å storme statsministerkontoret, men vart stansa av politiet.

Styresmaktene har no innført portforbod i heile landet og store tryggingsstyrkar er på gatene i Colombo.

Økonomisk krise

Sri Lanka står midt oppe i si verste økonomiske krise sidan lausrivinga frå Storbritannia i 1948. Akutt mangel på utanlandsk valuta gjer at landet ikkje lenger kan betale for mat, drivstoff og andre importvarer.

Bensinstasjonane har gått tomme for diesel, og det meste av gods- og persontransporten har stansa opp.

Dieselmangelen har også ført til omfattande straumbrot, inflasjonen er høg og butikkhyllene er i ferd med å gå tomme.

Misnøya med styresmaktene og ikkje minst Rajapaksa-familien er skyhøg.

Rajapaksa-familien har ikkje berre kontrollert president- og statsministerposten. Den eldste broren, Chamal, var inntil nyleg landbruksminister, den yngste broren Basil var finansminister, og nevøen til brørne, Namal Rajapaksa, var sportsminister.

(©NPK)

Ein munk var blant dei som vart skadde då tilhengjarar av regjeringspartiet på Sri Lanka storma protestleiren til opposisjonen utanfor presidentkontoret i Colombo måndag. Foto: AP / NTB

Minst fem menneske er drepne og 189 er skadde og sende til sjukehus etter samanstøytar mellom tilhengjarar og motstandarar av regjeringspartiet og tryggingsstyrkar på Sri Lanka måndag. Foto: AP / NTB

Tilhengjarar av regjeringa på Sri Lanka protesterte måndag mot statsminister Mahinda Rajapaksas avgang. Foto: AP / NTB

Tilhengjarar av regjeringspartiet på Sri Lanka storma måndag protestleiren til opposisjonen utanfor presidentkontoret i Colombo, væpna med køller og sette fyr på telta der. Foto: AP / NTB