Ti omkom då tribune kollapsa i Etiopia
Ti menneske mista livet og over 100 vart skadde då ein tribune rasa saman under ei kristen-ortodoks feiring i den etiopiske byen Gondar, opplyser legar.
Ulykka skjedde under epifani-feiringa til den etiopiske ortodokse kyrkja, ein høgtid som òg er kjent som timkat.
– Eg kan seie at vi hittil har ti døde. Talet skadde er 100 eller 150, seier ein lege ved universitetssjukehuset i Gondar. Ein annan lege stadfestar tala.
Hendinga fann stad ved Fasilidas-badet, der tusenvis av truande lèt seg døype i bassenget til minne om Kristus under det som er ein av dei viktigaste feiringane i Etiopia.
Hundrevis sat på ein tribune av tre då han plutseleg kollapsa midt under seremonien måndag morgon.
(©NPK)
Kristne frå den ortodokse kyrkja i Etiopia feirar timkat til minne om Jesu' dåp i hovudstaden Addis Abeba måndag. Den tragiske ulykka skjedde under feiringa av høgtida i byen Gondar. Foto: AP / NTB scanpix