Tilsynsmakter åtvarar mot mogleg pyramideselskap

– Finanstilsynet er kjent med at privatpersonar i Noreg som deltek i Better Experience (BE), aktivt prøver å verve nye kundar til verksemda, med løfte om høg forteneste. Finanstilsynet minner om at både yting av investeringstenester utan nødvendig løyve og medverknad til dette, er ulovleg og at tilsynet kan gi lovbrotsgebyr og/eller melde det til politiet, opplyser Finanstilsynet i ei pressemelding.

Det blir oppmoda til å vere kritisk til selskap som lovar høg forteneste og låg risiko.

– Sjekk alltid om selskapet står oppført i verksemdsregisteret til Finanstilsynet eller om Finanstilsynet har åtvara mot selskapet.

– Ofte er det også historier om andre personar som har investert, og tent godt. Hugs at om noko høyrest for godt ut til å vere sant, så er det gjerne det. Hald deg informert, og ver kritisk.

Har ikkje lov å drive i Noreg

Finanstilsynet har fått opplysningar om at BE har tilbode investeringstenester til norske investorar. Det har ikkje BE godkjenning til å drive med i Noreg. Selskapet har derfor ikkje nødvendig godkjenning etter norsk lov. Verksemda er heller ikkje registrert hos Finanstilsynet som tilbydar av vekslings- og/eller oppbevaringsteneste for virtuell valuta.

Forbrukartilsynet åtvarar også mot selskapet, og skriv i ei melding at det har komme mange førespurnader den siste tida om BE.

– Fleire spør om dette er eit ulovleg pyramidespel som vender seg mot barn og ungdom. På bakgrunn av informasjon om verksemda, ser vi at dei vervar deltakarar gjennom sosiale medium og medlemsmøte i norske byar. Vi har ikkje hatt tilsyn og konkludert med at BE er eit ulovleg pyramidespel, men ut frå opplysningane vi har fått til no, ser vi at verksemda har fleire likskapstrekk med ulovleg pyramidespel, skriv det.

Forbrukartilsynet overtok tilsynet med pyramidespel frå 1. januar 2023. Lotteritilsynet, som hadde ansvaret før, har åtvara mot å delta i BE og liknande konsept, nettopp fordi det har likskapstrekk med pyramidespel.

Ikkje svar frå BE

Ei pyramideverksemd er at nokon lover at du skal tene mykje pengar på kort tid ved å selje produktet deira vidare til familie og venner, og at dei også blir verva med utsikter til å tene gode pengar.

Det blir ofte betalt pengar utan at ein får handfaste produkt tilbake. For at noko skal reknast som ulovleg pyramidespel, må meir enn 50 prosent av omsetninga stamme frå verving eller overprisa varer.

BE er eit Dubai-basert føretak, som ifølgje E24 for eitt år sidan hevda å ha 60.000 aktive kundar totalt.

På nettsida si avviser BE at dei driv med pyramidespel. Dei gir til og med råd om korleis vurdere om noko er pyramidespel eller lovleg verksemd.

Føretaket har hatt arrangement i byar over heile Noreg, men har ikkje svart på spørsmål frå E24 om kor mange medlemmer dei har i Noreg.

Tidlegare i år vart eit arrangement avlyst i Sandefjord, då Oslofjorden Convention Center (OCC) kansellerte kontrakten med BE på grunn av åtvaringane frå norske styresmakter.

(©NPK)