Tine fann ulovleg Synnøve-ost i butikkar

Tine har retten til å bruke varemerket Jarlsberg. Follo tingrett konkluderte fredag med at Synnøve Finden må stanse osten dei har merkt «jarlsbergost-type». Dagen etter melde Aftenposten at Synnøve Finden var i ferd med å klistre merkelappen «sensurert» over den forbodne påskrifta på 100.000 ostepakker.

Tine-folk har i helga gjennomført stikkprøvar i butikkar i Oslo-regionen og fleire stadar funne osten av merket Kongsgård i kjølediskane, utan at emballasjen var sladda, skriv Nationen.

«Ved fleire utsalsstadar var osten tilgjengeleg i den omstridde forpakninga, noko som inneber eit klart brot på rettsavgjerda», skriv Tine i eit brev til Follo tingrett måndag.

– Tine har gjort oss merksame på to butikkar der det ikkje er rett merkt. Osten er tatt bort frå dei to butikkane, seier kategoridirektør Magnus Tollefsen i Synnøve Finden til avisa. Han seier dei gjer alt dei kan for å hindre at umerkte ostepakkar blir selt i fleire butikkar.

Dette blir delvis avvist av Magnus Tollefsen i Synnøve Finden. Han hevdar i ei pressemelding at «sensurert»- etikettane først vart bestilt klokka 12.31 fredag, etter at dei fekk rettsavgjerda klokka 10.46.

Hos Tine kallar ein operasjonen eit velregissert stunt og meiner konkurrenten har spekulert på ein ostesensur.

– Det er svært overraskande at ein aktør som Synnøve Finden ikkje respekterer rettsavgjerda. Retten meiner Synnøve tok ein bevisst og kalkulert risiko trass i at dei visste om rettane til Tine, seier direktør for kommunikasjon og samfunnsansvar Lars Galtung i ei pressemelding.

Hos Synnøve Finden avviser ein at dette var ei bevisst kampanje.

– Nei, dette handlar om å ta sine forholdsreglar dersom verste scenario skulle inntreffe. At dette er eit PR-stunt, er ikkje rett, seier Tollefsen til Aftenposten. (©NPK)