To skotne etter knivstikking i Israel

Polititalsmann Micky Rosenfeld seier dei antatte gjerningspersonane vart alvorleg skadde i hendinga i den israelske byen Beit Shemesh, som ligg rundt tre mil vest for Jerusalem.

Israelaren vart lettare såra. Det er uklart kven som skaut dei to arabarane.

Hendinga torsdag morgon er den siste i ei rad valdshendingar i Israel og det okkuperte Palestina den siste månaden. Ni israelarar er drepne, hovudsakleg i knivangrep. 47 palestinarar eller arabiske israelarar er drepne, av dei var over halvparten ifølgje israelsk politi gjerningspersonar.

Valdsbølgja har alarmert FN-sjef Ban Ki-moon, som tidlegare denne veka besøkte området i håp om å roe gemytta. Den diplomatiske framstøyten for å dempe valden fortset torsdag når USAs utanriksminister John Kerry møter Israels statsminister Benjamin Netanyahu i Berlin. (©NPK)