Tokyobørsen slår tilbake etter brexit-fall

Nikkei 225-indeksen, som fall nesten 8 prosent fredag, steig 1,4 prosent til 15.159,24 poeng fram til lunsjpausen. Samtidig løfta Topix-indeksen seg 0,9 prosent til 1.215,58 poeng.

– Det er vanskeleg å seie om marknaden har fordøya avstemminga, sidan det er uklart kven som skal leie samtalane om EU-exiten. Situasjonen vil ikkje vere klar før i oktober, og no er marknaden sensitivt for negative nyheiter, så vi kan komme til å sjå meir ustabilitet, seier Toshihiko Matsuno, strateg i SMBC Friend Securies.

Mens investorane ser ut til å velje antatt trygge plasseringar, som gull og yen, heldt det britiske pundet fram å falle i den asiatiske handelen.

Fredag nådde pundet sin lågaste verdi mot amerikansk dollar på 31 år – 1,3229 dollar. Valutaen henta seg inn og vart omsett for 1,3670 dollar i New York fredag ettermiddag, men fall til 1,3368 dollar måndag formiddag.

Børsar verda over stupte fredag etter at det vart klart at britane hadde stemt for å forlate EU. Totalt førte avgjerda til tap på over 2.000 milliardar dollar i den globale finansmarknaden, ifølgje nyheitsbyrået AFP.

Også på Kinas børsar peikte pilene oppover måndag formiddag. Shanghai Composite-indeksen la på seg 0,9 prosent og Shenzhen Composite-indeksen 1,5 prosent. Samtidig fall Hang Seng-indeksen i Hongkong 0,7 prosent. (©NPK)