Tre tilsette i PST stansa med våpen på flyplass i Kongo

Tre PST-tilsette vart torsdag stansa på flyplassen i den kongolesiske hovudstaden og fråtekne våpena. PST seier at dei tre ikkje er arresterte.

Publisert: 30.09.2022 kl 11:45

NRK skriv at kongolesiske medium har publisert bilete av det som skal vere berelisens for eitthandvåpen utskrive av det kongolesiske innanriksdepartementet.

Dei tre PST-tilsette har fått løyve til å ha kvar sin Sig Sauer-pistol med 100 patroner for sjølvforsvar for perioden 29. september til 6. oktober.

– PST er kjent med meldinga om arrestasjonar. Dette stemmer ikkje, personane er ikkje arresterte, seier seniorrådgivar Martin Bernsen i PST til NRK.

Han ønskjer ikkje å kommentere saka utover dette.

Den norske ambassaden i Kongo skriv på Twitter at våpena vart beslaglagde på flyplassen sjølv om ambassaden på førehand hadde vore i dialog med kongolesiske styresmakter.

Ambassaden skriv også at dei PST-tilsette er i Kongo for å førebu klima- og miljøminister Espen Barth Eides besøk neste veke der til det siste formøtet før årets klimatoppmøte COP 27.

(©NPK)

Tre tilsette i PST blei torsdag stoppa med våpen på flyplassen i Kongos hovudstad. Foto: Gorm Kallestad / NTB