Trettebergstuen til NTB: – Fifa har skylappane på

Kulturminister Anette Trettebergstuen rosar EU-parlamentarikarane for den tøffe kritikken som torsdag vart retta mot Det internasjonale fotballforbundet.

EU-parlamentet vedtok torsdag ein resolusjon rundt menneskerettssituasjonen i Qatar. Samtidig vart det brukt tungt skyts mot Det internasjonale fotballforbundet (Fifa).

I resolusjonen heiter det mellom anna at tildelinga av den pågåande verdsmeisterskapen vart gjord på bakgrunn av truverdige påstandar om korrupsjon og bestikkingar. Korrupsjonen i Det internasjonale fotballforbundet blir omtalt vidare som utstrekt, systematisk og djupt forankra.

I tillegg understrekar parlamentarikarane korleis Fifa på alvorleg vis har skadd «ryktet og integriteten til internasjonal fotball».

– Eg synest at det er bra at EU-parlamentet er så tydelege. Fifa har skylappane på og ser gjennom fingrane på både menneskerettsbrot og korrupsjon. Det kan vi ikkje akseptere, seier kultur- og likestillingsminister Anette Trettebergstuen til NTB.

Den danske parlamentarikaren Niels Fuglsang la allereie onsdag ut eit klipp der han sjølv var på talarstolen i EU-parlamentet.

– I dag er eg flau. I dag skammar eg meg. I dag er eg trist. Eg er flau, skammar meg og er trist fordi det som kanskje er den mørkaste augneblinken i idrettens historie finn stad akkurat no. VM-sluttspelet i Qatar, seier han der.

EU-parlamentet ber om ein full reformasjon av Fifa.

(©NPK)

Kultur- og likestillingsminister Anette Trettebergstuen er ikkje imponert over Fifa. Foto: Ole Berg-Rusten / NTB

Annonse