Tvinnereim skal leie dei internasjonale plastforhandlingane
Utviklingsministeren skal leie det norske arbeidet med å få på plass ein internasjonal plastavtale medan klima- og miljøministeren er i foreldrepermisjon.
– Utan nye, effektive tiltak vil plastforureining nesten doblast dei neste 20 åra. No har vi høve til å få på plass ein historisk plastavtale innan utgangen av 2024, seier klima- og miljøminister Andreas Bjelland Eriksen (Ap) om arbeidet som utviklingsminister Anne Beathe Tvinnereim (Sp) skal leie.
Plastforureining er eit av dei raskast veksande miljøproblema i verda.
FNs miljøforsamling vedtok i 2022 å utvikle ein internasjonal rettsleg bindande avtale for å stanse plastforureining. Noreg er ein pådrivar i forhandlingane.
Plastavtalen skal ferdigforhandlast i Busan i Sør-Korea i november.
Klima- og miljødepartementet vil framleis ha ansvaret for forhandlingsprosessen, som også omfattar Høyambisjonskoalisjonen mot plastforureining. Den består av 65 medlemsland og blir leidd av Noreg og Rwanda.
– Det vil vere fleire møte i haust, og innspurten i forhandlingane krev at Noreg er tydeleg til stades, seier Bjelland Eriksen i ei pressemelding.
Til helga reiser utviklingsministeren til Canada for å delta på politiske møte i samband med det fjerde forhandlingsmøtet i Ottawa.
– Det blir krevjande forhandlingar når alt frå store plastproduserande land til stillehavsøyar som druknar i plast, skal bli samde om ein avtale med felles globale reglar, seier utviklingsminister Anne Beathe Tvinnereim.
(©NTB)
Utviklingsminister Anne Beathe Tvinnereim (Sp) skal leie det norske arbeidet med å få på plass ein internasjonal plastavtale medan klima- og miljøministeren Andreas Bjelland Eriksen (Ap) er i foreldrepermisjon. Foto: Ole Berg-Rusten / NTB