Tyskar dømt til ti års fengsel for tortur i Syria
Ein 31 år gammal tysk statsborgar er dømt til ti års fengsel etter å ha vorte funnen skuldig i å ha torturert ein fange i hel i eit IS-fengsel i Syria.
Mannen, som tyske medium har identifisert som Nils D, er tidlegare dømt til fire og eit halvt års fengsel for å ha slutta seg til den ytterleggåande islamistgruppa IS.
Etter at dommen vart kjend, kontakta tidlegare fangar tyske styresmakter og fortalde korleis 31-åringen hadde torturert fangar i eit IS-fengsel i Manbij i Aleppo-provinsen i Syria.
Nils D tilhøyrde den såkalla Lohberg-brigaden av militante islamistar frå Dinslaken-Lohberg som drog til Syria og slutta seg til IS. Dinslaken-Lohberg ligg nord for Düsseldorf og var tidlegare kjent som eit kulldistrikt.
Påtalemakta la ned påstand om livsvarig fengsel under rettssaka, medan forsvararane kravde frifinning.
(©NPK)