Tyskland rustar opp jernbanen for 600 milliardar kroner

Den tyske regjeringa har vedtatt at jernbanenettet i landet skal gjennom ei storstilt modernisering for å få folk til å velje grønare transportløysingar.

edvard.stenersen@ntb.no/margunn@npk.no

Publisert: 14.01.2020 kl 14:22

Oppgraderinga, som vart kunngjort tysdag, vil koste 62 milliardar euro, eller drygt 600 milliardar kroner.

– Vi har akkurat underteikna den viktigaste moderniseringa nokosinne for jernbanen i Tyskland, sa transportminister Andreas Scheuer, som la til at dette er tiåret til jernbanen.

I tillegg til midla som staten stiller til rådvelde, vil togoperatøren Deutsche Bahn òg pløye 235 milliardar kroner inn i prosjektet.

Investeringane skal bidra til å skifte ut forelda infrastruktur, forbetre tilgangen for rørslehemma og renovere togbruer. Sjefen for Deutsche Bahn lovar at toga også skal bli meir punktlege.

Det å få fleire til å velje tog i staden for bil eller fly er ein sentral del av Tysklands klimatiltak. Landet tar sikte på å redusere klimagassutsleppa med 55 prosent innan 2030 samanlikna med nivået i 1990.