Vekst i lakseelvane

I 2015 vart det tatt 21 prosent meir laks i dei norske elvane enn året før. Hittil i år melder fleire elvar om ein vekst på 30 til 50 prosent samanlikna med i fjor, skriv Nationen.

I Finnmark og på Austlandet blir det meldt om fleire elvar der den samla fangsten frå i fjor allereie er overgått. Numedalslågen ligg an til å få sin beste sesong på 15 år.

– Vi har ved månadsskiftet juli/august i år fiska 15 tonn mot 10 tonn på same tid i fjor, altså bortimot 50 prosent auke. Vi må tilbake til 2002 for å finne ein like god sesong som det ser ut til å bli i år, seier leiar Asle Granerud i Numedalslågen forvaltningslag. Han seier gytebestanden ligg an til å ende på 160 prosent av det fastsette målet.

Også på Sørlandet, i Sogn og Fjordane, Trøndelag og Nordland er det betydeleg vekst i fangsten i fleire vassdrag. I Hordaland er det derimot fleire elvar der fangsten er mindre enn i fjor.

I fjor vart det fiska totalt 195.000 laks, sjøaure og sjørøye i dei norske elvane, ifølgje tal frå Statistisk sentralbyrå. (©NPK)