Verdssamfunnet lovar 21,4 milliardar kroner til Afghanistan

Storbritannia, Tyskland og Qatar var torsdag vertar for ein digital internasjonal nødhjelpskonferanse. FN hadde på førehand bede land verda over om å bidra med til saman 38 milliardar kroner for å finansiere livreddande nødhjelp til Afghanistan.

Men då konferansen var over, hadde det berre komme løfte på om lag 21,4 milliardar kroner.

Utanriksminister Anniken Huitfeldt (Ap) representerte Noreg på konferansen der ho lova at Noreg skal bidra med 700 millionar kroner.

– Afghanistan står overfor enorme utfordringar, både politiske og humanitære. Barn er spesielt utsette i den alvorlege humanitære situasjonen. Noreg gir 700 millionar kroner til humanitær assistanse og bistand til Afghanistan i 2022, seier ho i ei pressemelding.

– Prekært behov

FN-sjef António Guterres understreka i talen sin på givarkonferansen at behovet for støtte til Afghanistan er prekært. Han sa økonomien i landet risikerer å falle inn i ein «dødsspiral», og at enkelte afghanarar allereie har kjent seg tvinga til å selje barna sine og kroppsdelar for å overleve.

– Rike, mektige land kan ikkje snu ryggen til konsekvensane avgjerdene deira får for dei aller mest sårbare, sa Guterres, med tilvising til at vestlege land trekte seg ut av Afghanistan i fjor og lét Taliban overta makta.

60 prosent avhengig av hjelp

FN anslår at 24,4 millionar menneske i Afghanistan, nærare 60 prosent av befolkninga, er avhengige av humanitær bistand for å overleve. I sin heilskap treng den afghanske befolkninga meir enn tre gonger så mykje bistand som i 2021.

Halvparten av befolkninga i landet lid av matmangel. Økonomien har krympa med ein tredel, utviklingsbistanden har vorte kutta, reservane til den afghanske sentralbanken er frosen, og ingen land har anerkjent Taliban-regjeringa.

(©NPK)

Ein mann sit saman med to små barn saman med andre internt fordrivne i ein park i Kabul på dette biletet frå august i fjor. Situasjonen for sivilbefolkninga i Afghanistan har blitt kraftig forverra etter at Taliban tok makta i landet. Arkivfoto: Rahmat Gul / AP / NTB