Vestre oppmodar Rec Solar til nye fastpris-forhandlingar med kraftselskap

– Eg har gjennom helga vore i kontakt med kraftselskapa, som har sagt seg villige til å setje seg ned og forhandle med Rec Solar, sa Vestre då han kom ut frå Rec Solar i 10.30-tida.

Han hadde då møtt leiinga og tillitsvalde i solcellebedrifta i om lag ein time og karakteriserte møtet som godt.

Solcelleselskapet fekk i vår tilbod om gunstige fastprisavtalar på straum frå både Agder Energi og Statkraft, men eigarane takka nei.

– Selskapet skal sjølv få svare på kvifor dei takka nei. Det er ulike grunnar til kvifor dei valde det. No er det viktig at kraftselskapa kjenner si besøkstid, sa Vestre.

Det kom ingen lovnader om støtte frå regjeringa.

– Vi var her først og fremst for å lytte. Vi jobbar i to spor, både for at fleire kraftselskap kan tilby så gunstige fastprisavtalar som mogleg, og tiltak med LO og NHO. Eg veit ikkje om dei vil treffe Rec Solar, det er for tidleg å seie, sa Vestre.

– No må selskapet setje seg ned med kraftselskapet og diskutere moglegheita for gunstige maksprisavtalar, sa han.

Han understreka at bedrifta har mange viktige arbeidsplassar både i Kristiansand og i Porsgrunn.

Solcelleselskapet Rec Solar har vedteke å mellombels stanse produksjonen frå 3. september som følgje av dei høge straumprisane.

(©NPK)

Næringsminister Jan Christian Vestre (Ap) møtte leiinga og tillitsvalde i Rec Solar i Kristiansand måndag. Foto: Tor Erik Schrøder / NTB

Det blir inga krisehjelp til Rec Solar, men Vestre oppmodar til nye forhandlingar om fastpris på straum. Foto: Tor Erik Schrøder / NTB

Ordførar i Kristiansand, Jan Oddvar Skisland (Ap), deltok også på møtet. Foto: Tor Erik Schrøder / NTB