Stadfesta: Veton Berisha klar for Molde

Veton Berisha (28) har passert den medisinske testen og har signert ein kontrakt med regjerande seriemeister Molde.

Publisert: 24.01.2023 kl 10:51

Sist oppdatert: 24.01.2023 kl 15:44

Fleire medium skriv at Berisha vart presentert tysdag ettermiddag.

Tidlegare på dagen stadfesta administrerande direktør i klubben Ole Erik Stavrum at Berisha var på veg for å gå gjennom den medisinske testen.

Stavrum vil ikkje ut med kor mykje Molde betaler Hammarby. Ifølgje TV 2 har overgangen ei totalramme på rundt 37 millionar kroner.

Berisha kjem til dei regjerande seriemeistrane etter å ha vore i Hammarby i eit halvt år. I løpet av tida i den svenske hovudstaden fann Berisha vegen til mål fire gonger på 13 kampar i Allsvenskan.

Tidlegare har Berisha spelt for mellom anna Viking i to periodar og Brann i Noreg. Han har også spelt for Greuther Fürth i Tyskland og Rapid Wien i Austerrike. Spissen har ti landskampar for Noreg.

I 2021-sesongen skåra Berisha 22 mål for Viking i Eliteserien. I fjor vart det åtte fulltreffarar før vegen gjekk til Hammarby.

(©NPK)

Veton Berisha skal spele for sin tredje klubb i Eliteserien.
Foto: Christine Olsson / TT / NTB