Vil forby foreldre å DNA-teste barn

– Vi meiner det ikkje skal vere lov å teste barn med mindre det skjer innanfor helsevesenet. Dette er personopplysningar vi meiner barnet sjølv må råde over frå dei er 16 år, seier leiar for Bioteknologirådet og tidlegare SV-leiar Kristin Halvorsen til NRK.

Ein gentest kan svare på om barn har muskelanlegg for uthald eller sprint, og dermed også kva barnet kan bli best på innan idrett. Sidan i fjor har slike DNA-testar vore i sal på norske apotek.

Det er berre eit tidsspørsmål før dei blir tekne i bruk på barn, meiner Lars Engebretsen, forskingsleiar i Den olympiske komité og professor ved Idrettshøyskolen og UiO.

– I USA blir slike testar brukt av foreldre som har store ambisjonar på vegner av barna, for å sjekke om dei har best anlegg for uthald eller sprint, seier han.

Så langt i år er det selt over 10.000 DNA-testar frå 450 apotekar og frå importør. Det er ein salsauke på 50 prosent frå i fjor, opplyser selskapet Swereco som leverer testane.

Swereco Norge, som leverer DNA-testar til norske apotekar, ser ingen grunn til å forby dei.

– Vi må ha tillit til at befolkninga og foreldre ikkje brukar desse testane på barn. Dette er framtida, å prøve å stanse teknologiske framsteg er særdeles dumt, seier administrerande direktør Henning Rytterager. (©NPK)