Vingegaard overtok leiartrøya frå Pogacar etter fjelloppvisning

Det var 4,5 kilometer før målgang oppe på Col du Granon at dansken slo til og raskt fekk fleire sekund ned til Pogacar. Avstanden mellom dei to vart til slutt på 2.51 minutt. Vingegaard har no eit forsprang på 2.22 ned til den slovenske rivalen. Franske Romain Bardet tok tredjeplass på etappen, og er no nummer to i samandraget. Han er 2.16 minutt bak dansken.

Det var dessutan Vingegaards første etappesiger i Tour de France. Danmark har no teke 23 etappesigrar i rittet. Magnus Cort Nielsen frå EF har bidrege med éin siger hittil i årets ritt, før Vingegaard tok den 23. onsdagen.

– Det er heilt utruleg. Det er vanskeleg for meg å setje ord på dette. Det er dette eg har drøymt om. Etappesiger og gul leiartrøye i Tour de France, sa Vingegaard til Discovery før han måtte avbryte intervjuet.

For midt under sigersintervjuet kom lagkamerat Wout Van Aert og gav dansken ein kjempeklem. Då samanlagtleiaren fekk sett seg igjen, hylla han laga rundt seg.

– Vi hadde ein plan om å gjere det kjempetøft for konkurrentane. Eg tok ein sjanse, men eg hadde aldri klart det utan lagkameratane, sa den 25-åringen.

Jumbo-Visma ved Vingegaard og Primoz Roglic angreip Pogacar etter tur undervegs, men ingen av dei fekk tappa kreftene til den sterke slovenaren. Pogacar har mista fleire hjelperyttarar til korona tidlegare i rittet, og samanlagtleiaren låg i store delar av den ellevte etappen åleine saman med fleire frå Jumbo-Visma.

Avstandar

Det syntest som dei to siste års Tour de France-vinnar hadde full kontroll sjølv om han hadde igjen få hjelparar. Likevel måtte han gi tapt då Vingegaard trakka skikkeleg til på tampen. Han vart isolert og gjekk tom for næring og krefter.

Franske Warren Barguil sette fart på pedalane ned Col du Galibier, den høgaste passeringa til rittet. Han distanserte Simon Geschke og då dei gjekk inn i den siste stigninga til etappen på godt og vel 10 kilometer og 10 prosents stigning i gjennomsnitt, hadde han fått rundt 2.10 minutt til sine næraste utfordrarar.

Pogacar og duellantane hans var då rundt fire minutt bak.

Ny tøff etappe ventar

Colombianaren Nairo Quintana har vore anonym i rittet så langt, men onsdag gjekk han til angrep på samanlagtfavorittane.

Han er lagkamerat med Barguil i Arkea-Samsic. Han fekk eit halvt minutt ned til Pogacar og halvvegs til mål hadde han berre eitt minutt opp til leiaren.

Det var derimot før den unge dansken slo til og parkerte konkurrentane sine. Quintana rulla i mål på andreplassen, slått med 59 sekund av den 25 år gamle dansken.

Torsdag ventar ein ny tung fjelletappe. Då skal dei ha avslutning oppe på legendariske Alpe d'Huez.

(©NPK)

Danske Jonas Vingegaard imponerte og tok sin første etappesiger i Tour de France. Han tek over den gule leiartrøya. Foto: Daniel Cole / AP / NTB